VV reagon ndaj akuzave të Isa Mustafës dhe djalit të tij: Kryeministri e ka humbur toruan!

vv 1Pas sulmeve ofenduese të kryeministrit Isa Mustafa dhe të birit të tij Besnik Mustafa, kundër deputetit të saj, me një kumtesë zyrtare ka reaguar partia Vetëvendosje.
Vetëvendosje, transmeton Koha.net, në kumtesë e akuzon Mustafën për keqpërdorime e kriminalitet ekonomik për përfitime personale.
Në kumtesë Vetëvendosje ka shkruar:

“Pas korrupsionit dhe kriminalitetit 6 vjeçar në Komunën e Prishtinës, pas keqpërdorimeve me pronat në Bërnicë – për të përfituar vetë, pas bashkimit me Thaçin – përkundër të gjitha premtimeve që ua kishte dhënë anëtarësisë së vet, pas nënshkrimit të marrëveshjes më të dëmshme për Republikën e Kosovës prej përfundimit të luftës… kryeministri Mustafa bashkë me djalin e tij Besnik

Mustafa, kanë humbur kontrollin duke iu sulur deputetit të Vetëvendosjes Albin Kurti, me një gjuhë të paturpshme dhe të ulët. Ky kryeministër e ka humbur toruan dhe po sulmon në mënyrë të tillë çdo kundërshtar të tij.

Lëvizja Vetëvendosje i konsideron të papranueshme vendimet dhe sjelljet e kryeministrit dhe kërkon me ngulm dorëheqjen e tij.

Një kryeministër hajn, me djem hajna që marrin paratë e buxhetit të shtetit; një kryeministër që është në gjendje ta shesë krejt Kosovën veç sa për të mbetur vet në pushtet, nuk i duhet Kosovës. Një kryeministër i tillë duhet të jap urgjent dorëheqje. Dhe nëse nuk e bën këtë, duhet të shkarkohet urgjent nga qytetarët”.