Reagon Vetëvendosje: Vazhdimi i paraburgimit për deputetët ridëshmon lidhjen e Kalludrës me Veselin

Lëvizja Vetëvendosje ka reaguar pas seancës së sotme ndaj deputetëve Albin Kurti, Donika Kadaj-Bujupit e Albulena Haxhiut.

Kurtit dhe Kadaj-Bujupit iu vazhdua paraburgimi, ndërkohë seanca e radhës u caktua të mbahet më 20 dhjetor të këtij viti.

VV thotë se gjyqtari i rastit, Beqir Kalludra nuk ishte në gjendje të sillte sot me detyrim Kadri Veselin për të dëshmuar, njëashtu edhe deputetin Armend Zemajn, kështu duke u ridëshmuar lidhja e gjyqësorit me Veselin.

Ja reagimi i plotë:

Në gjyqin politik që po i bëhet deputetëve të Kuvendit të Republikës; Albin Kurti, Donika Kadaj, Albulena Haxhiu; gjyqtari Beqir Kalludra vazhoi paraburgimin për Albin Kurtin dhe Donika Kadaj derisa nuk ishte në gjendje të urdhërojë sjelljen me detyrim në gjykatë të Kadri Veselit dhe Armend Zemajt në cilësinë e dëshmitarëve. Tashmë, njëanshmëria e këtij gjyqtari të specializuar kundër VETËVENDOSJE!-s është edhe më e dukshme. Ai nuk e fsheh anën që mban.

Kalludra mundohet ta fsheh vetëm demaskimin e veprimeve të tij. Sot nuk i lejoi as mediat që ta transmetojnë drejtpërdrejtë këtë përndjekje politike.

Vazhdimi i paraburgimit për deputetët deri më 20 dhjetor është i papranueshëm, skandaloz dhe shpërfytyrim i drejtësisë. Vendimin për vazhdimin e paraburgimit, Kalludra e mori veç pak pasi e kërcënoi deputeten Albulena Haxhiu me shprehjet: “Ta marr fjalën dhe të dënoj”, duke përmendur me nervozitet edhe kallëzimin penal që e ka ngritur VETËVENDOSJE! ndaj tij.