Ky është plani i Vetëvendosjes se si të veprohet pas seancës së 24 gushtit

Për të gjashtën herë me radhë, dje dështoi konstituimi i Kuvendit të Republikës së Kosovës pasi që koalicioni i cili, sipas vendimit të Gjykatës Kushtetuese, ka të drejtën për ta propozuar kandidatin për kryetar Kuvendi, nuk e bëri atë duke pranuar haptas se nuk i ka numrat, shkruan Periskopi.

Deputetët e Vetëvendosjes dhe ata të koalicionit LAA kanë vazhduar të jenë të vendosur për të mos e votuar kandidatin Kadri Veseli, mirëpo kanë thënë se nëse PAN paraqet emrin e një kandidati tjetër për kryetar të Kuvendit, atëherë do të shqyrtohet mundësia për ta votuar.

Këtë e ka thënë edhe sot për Periskopin deputeti nga radhët e Vetëvendosjes, Faton Topalli.

Ai tha se duke pas parasysh situatën e rëndë në vend dhe duke dashur që institucionet të ndërtohen sa më shpejt,  ata mund të votojmë një kandidat, në mesin e kandidatëve të PAN-it për Kryetar të Kuvendit, por ky nuk duhet të jetë deputeti Kadri Veseli.

“Mendoj që ky qëndrim i yni është larg përtej interesave të ngushta partiake dhe maksimalisht në interes të funksionalizimit të institucioneve”, tha Topalli për Periskopin.

Sipas tij, problemi është që PAN ka krizë të brendshme dhe prandaj nuk po bëhet asnjë propozim.

“Pra dallimet e brendshme në PAN po bëjnë që Kuvendi të mbetet peng i personave me ambicie te ngushta personale”.

E pas kësaj situate të krijuar, Topalli shpreson që LDK dhe partnerët e  saj të bashkëpunojnë me VV-në për t’i mbledhur 61 nënshkrime e për ta nxjerrë Kuvendin nga bllokada.

“Pas bllokadës së Kuvendit nga PAN, varet shumë prej LDK-ës se a do te funksionalizohen institucionet shpejt, apo do t’i lihet pafundësisht kohë PDK-ës, e së paku deri në përfundim të zgjedhjeve lokale, ta mbajnë vendin pa Kuvend funksional. Ne jemi të vetëdijshëm për situatën dhe përgjegjësinë që kemi, prandaj dhe po sillemi me përgjegjësi maksimale” ka thënë deputeti Topalli./Periskopi/