Haradinaj thotë se janë prishur marrëdhëniet institucionale

Kryeministri Ramush Haradinaj ka mbajtur sot një konferencë me gazetarë pas mbledhjes së Qeverisë.

Ai u është përgjigjur pyetjeve të gazetarëve lidhur me shkarkimin e ministrit të Punëve të Brendshme Flamur Sefaj dhe hezitimit të presidentit për të shkarkuar nga detyra shefin e Agjencisë Kosovare të Intelegjencës, Driton Gashi, ashtu siç ishte propozuar nga kryeministri.

“Janë prishur marrëdhëniet institucionale. Ministri është kompetencë vetëm e imja, kurse i dyti është proces i përbashkët. Presidenti ka punët e veta të shohim”, ka thënë Haradinaj.

Haradinaj më herët kishte deklaruar se dy zyrtarët e shkarkuar kanë “shkuar në shtëpi”, por më pas doli se presidenti i vendit Hashim Thaçi ka refuzuar shkarkimin e shefit të AKI-së.

Kryeministri Ramush Haradinaj kishte marrë vendim për shkarkimin e ministrit dhe shefit të AKI-së pas aksionit që kishin zhvilluar për dëbimin e shtetasve turq me kërkesë të Republikës së Turqisë, por pa dijeninë e krerëve institucionalë të vendit.