Bunarët u kontaminuan nga kanalizimi, një lagje e Shkarrashnikut të Malishevës pa ujë

Bunarët e një lagjeje të fshatit Shkarrashnik të Malishevës ishin burimi i vetëm i ujit për pije për një familje, raporton KTV.

Ka dy muaj që kanalizimi i fshatit ua ka përfshirë atë dhe askush nga komuna nuk ka ndërhyrë.

Fitim Thaçi thotë se tashmë i janë sëmurë bashkëshortja dhe vajza e të vëllait si pasojë e ujit të kontaminuar, meqë e konsumuan ujin pa e ditur se uji ishte helmuar. Ai i është drejtuar disa herë komunës për t’i kërkuar ndihmë, por nuk është përfillur aspak.

Së fundi, ka bërë edhe një kërkesë me shkrim, pasi disa herë ishte lajmëruar nëpër sportelet e komunës. Drejtori i Urbanizmit në Komunën e Malishevës, Ahmet Morina, thotë të jetë krejt normale që kanalizimi të pësojë prishje, por nuk e thotë arsyen pse nuk shkuan t’i dalin në ndihmë familjes që u ankua.

Krejt fajin për problemet ia hedh qeverisjes së kaluar dhe vetë qytetarëve për pakujdesi. Ai shton se sistemi i kanalizimit i takon Hidroregjionit Jugor, por meqë problemet janë të vazhdueshme, kanë hapur tender për mirëmbajtjen e gjithë sistemit.

Ndërsa Njazi Bytyçi nga Hidroregjioni Jugor, i ka thënë KTV-së se nuk kanë përgjegjësi për Fshatin Shkarrashnik, pasi nuk është i kyçur në ujësjellës. Derisa zyrtarët komunalë hedhin fajin te njeri-tjetri, Fitim Thaçi është ndier tërësisht i pafuqishëm për ta zgjidhur problemin e tij që po ia dëmton familjen.