Begaj i takoi nxënësit parafillorë në kuadër të shënimeve për festën e 28 Nëntorit

begaj_nxenesitKryetari i Komunës së Malishevës Ragip Begaj, në kuadër të shënimeve të ndryshme për nderë të festës kombëtare të 28 Nëntorit, sot ka pritur nxënësit e ciklit parafillorë të SHFMU “Naim Frashëri” në Banjë, të cilëve ju ka uruar festën e Flamurit.

Fillimisht kryetari Begaj i falënderojë për vizitën në prag të kësaj feste madhështore dhe pasi i uroi  nxënësit, ai i njoftoi në formë kronologjike për rëndësinë historike të datës së 28 Nëntorit, duke filluar ngritja e flamurit kombëtar nga Skënderbeu, në kalanë e Krujës në vitin 1443, pastaj shpallja e Pavarësisë së Shqipërisë me 28 Nëntor 1912 në Vlorë, ditëlindja e Komandantin Legjendar të UÇK-së, Adem Jashari (28.11.1955) dhe dalja e parë publike e UÇK-së më 28 Nëntor 1997 në Llaushë.

Ndërsa, mësuesja Sheqerie Shurdhaj, e falënderoi kryetarin dhe gjithë punonjësit e Komunës, për pritjen, si dhe shpreh gëzimin që nxënësit patën sot. Me këtë rast janë shkëmbyer edhe dhurata, ku nxënësit parafillorë, i dhuruan kryetarit Begaj një punim me karakter kombëtar, ndërsa Begaj, ju dhuroi një flamur kombëtar.

Me rastin e 28 Nëntorit nxënësit ishin të përgatitur me flamuj e shirita kuç e zi, si dhe ata bënë recitime e vjersha kushtuar kësaj dite.

52 nxënësit parafillorë, pas takimit me kryetarin Begaj, do të vizitojnë shtatoren e Komandantit Legjendar Adem Jashari në sheshin e dëshmorëve në Malishevë, muzeun e qytetit dhe stacionin policor në Malishevë.

022